TIRANË – Bizneset shqiptare po i drejtohen gjithnjë e më shumë bankave për të marrë kredi, të nxitura nga ulja e interesave. Sipas Bankës së Shqipërisë, me vendimin për të ulur normën bazë të interesit në fillim të korrikut, pritet që kushtet e huamarrjes të përmirësohen më tej si për bizneset, ashtu edhe për qytetarët.
Në vrojtimin e fundit të publikuar nga BSH, theksohet se gjatë tremujorit të tretë të vitit 2025, pritet rritje e kërkesës për kredi nga bizneset, si nga ato të mëdha ashtu edhe nga ndërmarrjet e vogla e të mesme. Shumica e këtyre kredive janë të orientuara drejt investimeve.
“Kërkesa për kredi e bizneseve pritet të rritet si në terma të madhësisë së biznesit, ashtu edhe në terma të qëllimit të përdorimit të kredisë,” thuhet në raportin zyrtar të Bankës së Shqipërisë.
Pavarësisht këtij trendi pozitiv në kërkesë, bankat tregtare vijojnë të tregojnë kujdes në procesin e miratimit. Kushtet për dhënien e kredisë mbeten të pandryshuara, ndërsa është vënë re një shtim i kërkesave për kolateral, sidomos për ato biznese që kanë një histori të mëparshme me probleme në shlyerjen e detyrimeve.
Kjo qasje konservatore e bankave shihet si përpjekje për të ruajtur cilësinë e portofolit të kredisë, pavarësisht përmirësimeve në treguesit ekonomikë dhe politikës monetare lehtësuese të ndërmarrë nga autoriteti qendror.
Be First to Comment