DELVINË – Situata me zjarret në jug të vendit vijon të jetë alarmante. Pasditen e sotme, flakët janë përhapur me shpejtësi dhe kanë hyrë në drejtim të fshatit Kalasë, në bashkinë e Delvinës.
Burime lokale bëjnë me dije se zjarri po rrezikon seriozisht banesat e fshatit, ndërsa banorët kanë kërkuar ndërhyrje urgjente nga ajri për të shmangur përhapjen e mëtejshme të flakëve.
Dy mjete zjarrfikëse nga Himara dhe forcat e Armatosura janë nisur drejt zonës për të ndihmuar në përballimin e flakëve, por për shkak të terrenit të vështirë dhe erërave të forta, situata paraqitet ende e vështirë për t’u menaxhuar.
Autoritetet lokale dhe emergjencat civile janë në gatishmëri, ndërsa bëhet apel për ndërhyrje më të koordinuar për të parandaluar dëme të mëdha në banesa dhe mjedis.