Autoriteti Kombëtar i Ushqimit (AKU) kalon në një fazë të re rivlerësimi, pasi Ministrja e Bujqësisë dhe Zhvillimit Rural, Anila Denaj, ka pezulluar përkohësisht të gjitha inspektimet që nuk janë të planifikuara dhe të miratuara më parë.
Vendimi vjen pas kritikave të kryeministrit Edi Rama, i cili gjatë një vizite në Cërrik kërkoi ndërhyrje të menjëhershme në funksionimin e këtij institucioni.
Në këtë kuadër, është ngritur një Komision i Posaçëm me 5 anëtarë që do të shqyrtojë me kujdes kompetencat dhe integritetin e trupës së inspektorëve aktualë. Komisioni do të aplikojë testime me shkrim dhe me gojë për çdo inspektor, ndërsa do të shqyrtojë edhe kandidatët e rinj që synojnë t’i bashkohen këtij institucioni.
Tre nga pesë anëtarët e komisionit janë përfaqësues nga Universiteti Bujqësor i Tiranës, çka synon të sjellë një standard më të lartë profesionalizmi dhe objektiviteti në vlerësim.
Ministrja Denaj u shpreh se kjo nismë është pjesë e një reforme të thelluar, me synim krijimin e një qasjeje të re pune dhe një etike moderne brenda AKU-së.
“…kam urdhëruar pezullimin e ushtrimit të aktivitetit të inspektimeve pa planifikim paraprak dhe atyre të pamiratuara. Ky urdhër njëkohësisht ka në bazë edhe ngritjen e një komisioni të posaçëm me pesë anëtarë, unë këtu dua të falenderoj mbështetjen e Universitetit Bujqësor të Tiranës, i cili në përbërje të këtij komisioni do të ketë tre anëtarë dhe do të kryesohet nga profesor Iliri. Komisioni do të vlerësojë në formë të shkruar dhe me gojë inspektorët e AKU-së.
Be First to Comment