Në një mbledhje të fundit mes Kryeministrit Edi Rama dhe kryetarëve të bashkive, në kuadër të një fushate për “eficiencë të re” në administratën vendore, është regjistruar një moment i pazakontë që ka ngjallur diskutime të gjera.
Rama ka kërkuar dorëheqjen kolektive të të gjithë drejtorëve që varen nga bashkitë, si pjesë e një nisme për të rritur standardet dhe për të “riformatuar” administratën në nivel lokal. Sipas burimeve, Kryeministri ka qenë i prerë në kërkesën e tij, duke bërë të qartë se nuk do të ketë tolerime për ata që nuk zbatojnë këtë vendim.
Por jo të gjithë e kanë pritur me të njëjtën bindje. Kryebashkiaku i Finiqit, Romeo Çakuli, ka zgjedhur të përgjigjet me një notë ironike që ka habitur të pranishmit. “Do i shkarkoj të gjithë drejtorët dhe do i marr përsëri në punë pas një jave,” ka deklaruar ai, sipas dëshmive nga salla.
Ky koment – për disa një batutë për të zbutur tensionin, për të tjerë një formë rezistence e fshehtë – ka hapur debat mbi qasjen e drejtuesve vendorë ndaj urdhrave të qeverisë qendrore. Nëse deklarata ishte një kundërshti ndaj mungesës së analizës konkrete për secilin drejtues, apo thjesht një humor politik, mbetet për t’u parë.
Nga Bashkia Finiq ende nuk ka një reagim zyrtar mbi ngjarjen, ndërsa pritet nëse Çakuli do ta çojë përpara vendimin për të shkarkuar drejtorët, apo gjithçka do të mbetet në kuadrin e një “shake” me mesazh.
Kjo situatë vjen në një kontekst më të gjerë reformash, ku bashki si Tirana, Durrësi, Vlora dhe Fieri po përjetojnë ristrukturime të thella. Kryeministri Rama ka theksuar se “pastrimi” i institucioneve është i domosdoshëm për të ngritur nivelin e llogaridhënies.
Por ajo që ndodhi në këtë takim është një kujtesë se marrëdhënia mes qeverisë qendrore dhe pushtetit vendor nuk është gjithmonë lineare. Ironia e Çakulit shfaq një realitet ku autonomia lokale, shpesh, bie në sfidë me presionin e lartë politik për rezultate dhe reformë të shpejtë.
Be First to Comment