Prej së shtunës, ish-ministri i Shëndetësisë Ilir Beqja po trajtohet në Qendrën Spitalore Universitare “Nënë Tereza”, për shkak të një gjendjeje shëndetësore të rënduar. Burime nga brenda spitalit bëjnë me dije se ai është paraqitur me temperaturë të lartë dhe një infeksion serioz në lëkurë, ndërsa mjekët po ndjekin nga afër evolucionin e situatës.
Pavarësisht trajtimit intensiv, deri më tani nuk është raportuar për ndonjë përmirësim të ndjeshëm në gjendjen e tij. Ende nuk dihet me saktësi se çfarë e ka shkaktuar infeksionin dhe temperaturën e lartë.
Kujtojmë se kjo nuk është hera e parë që Beqja ka pasur probleme shëndetësore gjatë vitit. Në muajin prill, ai mungoi në disa seanca gjyqësore për çështjen e sterilizimit, duke dorëzuar dokumentacion mjekësor që justifikonte mungesat e tij. Në një rast, ai raportoi një recetë mjekimi pa detaje të mëtejshme për diagnozën.
Së fundmi, më 14 korrik, u bë publike një kartelë mjekësore e dorëzuar nga Beqja në SPAK, ku ishte përmendur simptomatika e “sinkopisë” – një gjendje që shkakton humbje të përkohshme të vetëdijes. Megjithatë, ky dokument lidhet me një episod më të hershëm dhe mbetet e paqartë nëse ka ndonjë lidhje me përkeqësimin aktual të shëndetit të tij.
Derisa të ketë një njoftim zyrtar nga autoritetet shëndetësore apo familjarët, mbetet e paqartë se cilat janë arsyet e plota që kanë çuar në këtë përkeqësim të gjendjes së tij. Situata po ndiqet nga afër edhe nga mediat dhe opinioni publik.
Be First to Comment