Imazhet satelitore të publikuara nga NASA kanë kapur me saktësi vatrat aktive të zjarrit që janë shpërndarë në të gjithë rajonin e Mesdheut. Nga Greqia në Spanjë, nga jugu i Francës në Cipro, si dhe në Itali e Shqipëri, qindra zjarre janë duke përfshirë zona të mëdha pyjore dhe hapësira të gjelbërta, duke e kthyer korrikun në një nga javët më të rënda të kësaj vere për sa i përket emergjencave mjedisore.
Në fotografitë satelitore, çdo pikë e kuqe përfaqëson një vatër aktive, pavarësisht përmasave të saj. Imazhet tregojnë me detaje kohën e zhvillimit të zjarreve – që nga ato aktive aktualisht, tek ato të ndodhura në 24 orët e fundit, e deri tek vatrat e regjistruara gjatë javës së kaluar.
Sipas të dhënave, vala ekstreme e të nxehtit që ka përfshirë rajonin e Ballkanit dhe Italinë ka favorizuar ndjeshëm përhapjen e flakëve. Shumica e zjarreve janë regjistruar në zona pyjore, por disa nga pikat e kuqe në hartë mund të lidhen edhe me aktivitete njerëzore si djegie bujqësore, impiante industriale apo dhe shpërthime të lidhura me konfliktin në Ukrainë.
Shqipëria, ashtu si vendet e tjera të rajonit, po përballet me një sezon zjarresh gjithnjë e më të vështirë për t’u menaxhuar, ndërkohë që imazhet nga hapësira konfirmojnë se situata ka përmasa të gjera dhe kërkon koordinim të përforcuar ndërkombëtar.
Be First to Comment