Nga 1 janari deri më 30 shtator 2026, qytetarët dhe bizneset do të kenë mundësinë të rivlerësojnë pronat e tyre duke i përafruar me çmimet reale të tregut, sipas një projektligji të propozuar nga Ministria e Financave, tashmë në fazën e konsultimit publik.
Ndryshe nga tatimi aktual prej 15%, në këtë proces të ri rivlerësimi do të aplikohet një normë tatimore prej vetëm 5%. Kjo përfaqëson një lehtësim të ndjeshëm krahasuar me vitin 2022, kur norma ishte 3%.
Sipas ministrisë, kjo nismë do të ketë ndikim pozitiv në buxhetin e shtetit përmes rritjes së të ardhurave nga tatimi mbi rivlerësimin, pa pasur nevojë për ndryshime në normat e tjera tatimore. Qëllimi kryesor është rritja e transparencës në tregun e pasurive të paluajtshme dhe formalizimi i vlerës së tyre reale, në një kohë kur çmimet e tregut kanë pësuar rritje të ndjeshme.
Projektligji parashikon gjithashtu që të drejtën për rivlerësim do ta kenë edhe ata që janë në proces regjistrimi të pronës apo që kanë pasuri të legalizuara sipas legjislacionit në fuqi.
Nëse miratohet, ky do të jetë procesi i pestë i rivlerësimit brenda 13 viteve. Procesi i fundit u zhvillua në periudhën 2020–2022, ku përfituan mbi 110 mijë familje dhe u rivlerësuan më shumë se 168 mijë pasuri. Nga ky proces, buxheti i shtetit arkëtoi rreth 14 miliardë lekë.
Ministria ka publikuar gjithashtu edhe çmimet e reja të referencës për çdo qark të Shqipërisë, që do të përdoren si bazë për rivlerësimin.
Be First to Comment