Gazetarja Klodiana Lala ka zbuluar disa nga emrat potencialë që mund të zëvendësojnë Altin Dumanin në krye të SPAK, ndërsa ka ndezur një debat të fortë mbi statusin e prokurorëve të këtij institucioni. E ftuar në emisionin “Të Paekspozuarit” në MCN TV, Lala deklaroi se mandati trevjeçar i Dumanit është drejt përfundimit, dhe se gara për pasuesin do të jetë e ashpër.
Emrat që përmenden si pasues të Dumanit
Sipas Lalës, kandidatët e mundshëm janë:
• Adnan Xholi, i cili ka kandiduar më parë për këtë post;
• Klodian Braho, një nga emrat më aktivë të SPAK;
• Arben Kraja, që ka drejtuar më herët institucionin dhe tani ka të drejtë të rikandidojë.
“Emri që do të marrë drejtimin e SPAK do të përcaktojë të ardhmen e këtij institucioni. Vetëm fakti që ka një betejë për drejtuesin e BKH, imagjinoni çfarë gare do të jetë për SPAK,” – tha Lala.
Debati: A duhet të kenë prokurorët status të përjetshëm?
Klodiana Lala ngriti idenë që prokurorët e SPAK duhet të kenë status të përjetshëm, siç ndodh në disa vende të zhvilluara. Ajo theksoi se përballen me krimin e organizuar dhe rrezikojnë jetën e tyre, prandaj nuk është normale që pas 9 vitesh të rikthehen në prokuroritë e rretheve ose të mbeten pa detyrë.
“Një prokuror i SPAK është i kualifikuar për hetime shumë të rrezikshme. Ata luftojnë banda dhe grupime kriminale që kërcënojnë edhe familjet e tyre. Nuk mund të barazohen me çdo prokuror tjetër dhe të humbasin statusin pas nëntë vitesh,” u shpreh ajo.
Përplasja me Andi Bushatin
Nga ana tjetër, analisti Andi Bushati kundërshtoi me forcë këtë propozim, duke thënë se Kushtetuta është e qartë dhe nuk duhet ndryshuar për askënd. Ai akuzoi disa nga prokurorët e SPAK se kanë mbyllur çështje të mëdha në favor të pushtetit.
“Për këta që kanë mbyllur dosje si ajo e patronazhistëve, të ndërrohet Kushtetuta? Janë bërë xhelatët e pushtetit. SPAK nuk është i shenjtë. Këta nuk janë heronj, janë palaço që kanë mbrojtur interesat e qeverisë,” – tha Bushati, duke iu referuar edhe deklaratave të Yuri Kim që i kishte quajtur prokurorët “heronj”.
Lala: Nuk është çështje privilegjesh, por sigurie dhe profesionalizmi
Gazetarja u përpoq të sqarojë se nuk kërkon privilegje për individë të caktuar, por garanci për vijimësinë e një strukture të ndërtuar me vështirësi.
“Duhet të ketë kritere vlerësimi, por jo largim automatik. Ka prokurorë që i kanë çuar fëmijët jashtë vendit nga frika e hakmarrjes së krimit. Të paktën për këta njerëz, që luftojnë në vijën e parë, të ketë siguri dhe mbrojtje reale,” shtoi ajo.
Bushati: Përse të bëjnë përjashtim këta?
Në një kundërpërgjigje të fortë, Bushati theksoi se nuk ka asnjë arsye që SPAK të trajtohet ndryshe nga çdo institucion tjetër.
“Pse nuk i ruajtëm edhe ata të Krimeve të Rënda që i nxorri vettingu? Pse duhet të bëjmë heronj këta? Nëse reforma në drejtësi u zbatoi rregullat për të gjithë, le të mbarojnë mandatin e të ikin,” përfundoi ai.
Be First to Comment