Shqipëria ka humbur një nga figurat më të rëndësishme të politikës së pas viteve ’90. Abdyl Xhaja, ish-zv.kryeministër, ish-ministër dhe ish-deputet i Partisë Demokratike, është ndarë nga jeta në moshën 82-vjeçare, duke lënë pas një trashëgimi të çmuar në ndërtimin e institucioneve demokratike dhe zhvillimin e sektorëve strategjikë të vendit
I lindur në Elbasan, Xhaja ishte ndër të parët që mori përsipër detyra të vështira në një kohë kur Shqipëria përjetonte transformimin më të madh historik, nga diktatura në një sistem demokratik. Ai dha një kontribut të veçantë në sektorët e energjisë, industrisë dhe burimeve minerare, në një periudhë kur vendi kishte nevojë për ekspertizë, qëndrueshmëri dhe vizion
Karriera e tij politike nisi që në fillim të viteve ’90, ku mbajti detyra kyçe në qeveritë e para pluraliste. Në vitin 1991 u emërua Zëvendësministër i Burimeve Minerare dhe Energjetikës, për t’u ngjitur më pas në postin e Zëvendëskryeministrit gjatë qeverisë kalimtare që përgatiti zgjedhjet e para të lira në Shqipëri. Ai shërbeu edhe si Ministër i Industrisë dhe më pas Ministër i Burimeve Minerare dhe Energjetikës, duke drejtuar me përkushtim një sektor që ndodhej në prag kolapsi, por që falë reformave të nisura filloi të ristrukturohej e të hapet për investime të huaja
Abdyl Xhaja ka qenë gjithashtu deputet i Partisë Demokratike, anëtar i Këshillit Kombëtar të saj, dhe më vonë këshilltar pranë Unionit të Investitorëve të Huaj, si edhe pranë Shërbimit Gjeologjik Shqiptar. Në çdo pozicion ku ka shërbyer, ai u identifikua me seriozitetin teknik dhe përkushtimin institucional
Inxhinier në formim, por vizionar në veprim, ai përfaqësonte një brez politikanësh të matur dhe të përkushtuar, që e panë politikën si shërbim ndaj qytetarëve dhe si mjet për të ndërtuar struktura solide të shtetit. Xhaja solli në politikën shqiptare një stil racional dhe të qetë, duke i dhënë përparësi zhvillimit të sektorëve strategjikë, dhe jo protagonizmit mediatik apo përplasjes politike të momentit
Me ndarjen nga jeta të Abdyl Xhajës, Shqipëria humb një nga arkitektët e periudhës së tranzicionit dhe një zë që përfaqësonte politikën e njerëzve të punës – të atyre që ndërtuan me përulësi dhe përkushtim themelet e një shteti të ri
Ngushëllimet më të sinqerta i shkojnë familjes, miqve dhe bashkëpunëtorëve të tij
Qoftë i paharruar kujtimi i tij dhe i nderuar kontributi që dha për Shqipërinë
Be First to Comment