Një aksident i rëndë është shënuar këtë pasdite në qytetin e Fushë Arrëzit, ku një automjet tip BMW ka humbur kontrollin dhe është përplasur me ambientet e një lokali, duke lënë të plagosura tre gra.
Ngjarja ndodhi në një zonë të banuar, ku mjeti që po lëvizte me shpejtësi doli nga rruga dhe u fut me forcë në verandën e lokalit, ku ndodheshin klientët. Në momentin e përplasjes, në një nga tavolinat e jashtme ishin ulur tre gra, të cilat mbetën të lënduara si pasojë e goditjes.
Njëra prej tyre, shtetasja F.B., e cila është edhe pronare e lokalit, është transportuar me urgjencë në Spitalin e Pukës për ndihmë mjekësore. Edhe dy gratë e tjera kanë pësuar dëmtime të lehta dhe ndodhen jashtë rrezikut për jetën.
Drejtuesi i automjetit, i identifikuar si Fatjon Ruka, është shoqëruar nga policia. Sipas informacioneve paraprake, dyshohet se ai po udhëtonte me shpejtësi të lartë në momentin që humbi kontrollin mbi mjetin.
Grupi hetimor ndodhet në vendngjarje dhe po punon për të zbardhur plotësisht shkaqet e aksidentit. Policia ka nisur procedurat për vlerësimin teknik të automjetit dhe testimin e shoferit.
Be First to Comment