Një fluturim nga Omaha drejt Detroit-it është detyruar të bëjë një ulje emergjente pasi një pasagjer shqiptar, 23-vjeçari Mario Nikprelaj, tentoi të hapte derën e emergjencës në mes të udhëtimit ajror.
Ngjarja ndodhi më 17 korrik 2025, gjatë fluturimit Delta Connection 3612, i operuar nga SkyWest Airlines, kur Nikprelaj u përfshi fillimisht në një debat me një stjuardesë, përpara se të përpiqej të hapte derën e avionit, duke shkaktuar panik dhe një përleshje fizike me anëtarë të ekuipazhit dhe pasagjerë të tjerë.
Sipas Policisë së Cedar Rapids, që ndërhyri menjëherë pas uljes së avionit në Aeroportin e Iowa Lindore, Nikprelaj u ndalua dhe më pas u transferua në Qendrën Korrektuese të Qarkut Linn. Ai tashmë përballet me akuza për sjellje të çrregullt, sulm, posedim të barnave me recetë pa autorizim, si dhe ngacmim në shkallën e parë. Autoritetet nuk përjashtojnë mundësinë e ngritjes së akuzave të tjera.
Një pasagjer në bord, i identifikuar si J. Spencer, ka shkruar në platformën X:
“U desh të devijonim në Cedar Rapids sepse ky njeri vendosi të hapte derën e emergjencës dhe më pas u përlesh me ekuipazhin dhe pasagjerët.”
Sipas dëshmitarëve, Nikprelaj ishte ngritur në këmbë dhe kishte hequr rripin e sigurimit ndërsa avioni ende po përgatitej për ngritje. Reagimi i menjëhershëm i ekuipazhit arriti të shmangte pasojat e rënda, duke çuar në uljen emergjente në Iowa.
Pavarësisht incidentit, avioni arriti në destinacionin përfundimtar në Detroit me një vonesë prej rreth 90 minutash, sipas të dhënave nga Flight Aware.
Mario Nikprelaj, i cili është nga Nebraska, ndodhet tashmë në pritje të procedurave ligjore në SHBA për një incident që ka rikthyer në vëmendje rrezikun e sjelljeve të rrezikshme gjatë fluturimeve komerciale. https://youtu.be/SdTJV67Dknw
Be First to Comment