Efektivi dhunoi kamerierin në Vlorë, Rama: Të përjashtohet nga Policia! Zyrtarëve s’do t’u tolerohen shkeljet që cenojnë komunitetin apo qytetarin

Një tjetër rast dhune me protagonist një efektiv policie ka trazuar opinionin publik, këtë herë në qytetin e Vlorës. Ardian Isufi, pjesëtar i Policisë së Dibrës, është identifikuar si autori i dhunimit brutal ndaj një kamerieri 18-vjeçar në një hotel, bashkë me një mik të tij. Pasi videoja e dhunës qarkulloi në rrjet, reagimi i Kryeministrit Edi Rama nuk vonoi.

Rama kërkoi përjashtimin e menjëhershëm dhe të përhershëm të efektivit nga radhët e Policisë së Shtetit dhe dorëzimin e tij para drejtësisë. “Asnjë shkelje që cenon qytetarin apo komunitetin nuk do të tolerohet”, deklaroi ai, duke e lidhur rastin me reformën e re për kontrollin e territorit, ku parashikohet ndëshkim më i ashpër për punonjësit e shtetit që bien ndesh me ligjin.

Por ndërsa Kryeministri shfaq zero tolerancë ndaj një efektivi të zakonshëm për një akt individual dhune — me të drejtë — lind një pyetje: Ku është kjo vendosmëri kur bëhet fjalë për abuzime shumë më të mëdha, të kryera nga njerëz me pushtet politik, ekonomik apo institucional?

Sa herë janë zbuluar skandale korrupsioni, dhunë institucionale apo shkelje flagrante të ligjit nga drejtues të nivelit të lartë, reagimi ka qenë ose i vakët, ose inekzistent. Kemi parë ministra të ikin natën pas skandaleve, për t’u rikthyer ditën në poste të reja. Kemi parë hetime që zvarriten për vite pa përfundim dhe zyrtarë që dalin të pafajshëm pavarësisht provave.

Ndërkohë, në reformën e re për kontrollin e territorit, Rama thotë se çdo punonjës shteti që shfrytëzon hapësira publike apo ndërton pa leje për qëllim fitimi, do të ndiqet penalisht dhe përjashtohet nga detyra për shumë vite. Një qëndrim teorikisht i drejtë, por që bie ndesh me realitetin në terren, ku vetë funksionarë të nivelit të lartë ndërtojnë resorte në zona të mbrojtura, pushtojnë hapësira publike dhe i kthejnë në biznese private, shpesh me mbështetjen ose heshtjen e institucioneve shtetërore.

Nëse Rama kërkon të jetë i besueshëm kur flet për drejtësi dhe rregull, duhet të tregojë të njëjtën vendosmëri dhe me “peshqit e mëdhenj” të sistemit, jo vetëm me ata që janë më të lehtë për t’u flijuar publikisht. Përndryshe, çdo reformë do të mbetet një fasadë, dhe çdo deklaratë — një tjetër zhurmë për të mbuluar heshtjen për krimet e vërteta.