Një kapitull i ri, shumë më i rëndë, po i shtohet hetimeve të nisura nga SPAK mbi shkeljet në prokurimet publike. Ajo që nisi si një dosje për manipulim tenderash, po shndërrohet tani në një hetim që përfshin edhe një grabitje me pasoja të rënda dhe një rast të dyshuar pengmarrjeje.
Burime të sigurta bëjnë me dije se SPAK i është drejtuar komisariateve të policisë në Elbasan dhe Librazhd me kërkesën për të verifikuar nëse gjatë vitit 2020 është raportuar ndonjë rast grabitjeje në banesë, apo kallëzim penal për një ngjarje që lidhet me rrëmbim personi.
Kjo kërkesë vjen pas zbardhjes së disa bisedave të përgjuara, ku e përfshirë del Lindita Skeja, zyrtare pranë Komisionit të Prokurimeve Publike. Skeja ndodhet aktualisht nën hetim për rolin e saj në afera të dyshuara me tenderat shtetërorë.
200 mijë euro të grabitura dhe një peng i rrëmbyer
Në një nga komunikimet e përgjuara, Skeja flet me familjarët e saj për një grabitje të ndodhur në banesën e tyre. Ajo pohon se autorët kanë marrë rreth 200 mijë euro, ndërsa ngjarja bëhet edhe më alarmante nga fakti që përmendet rrëmbimi i të vëllait, për të shmangur alarmimin e policisë.
Zyrtarja shfaqet e shqetësuar për pasojat që do të sillte denoncimi i rastit, ndërsa i trembet edhe sigurisë së familjes së saj.
Gjatë seancës së marrjes në pyetje, ajo ka pretenduar se shuma e konsiderueshme e parave kishte ardhur nga të afërm emigrantë në Greqi, por kjo version po hetohet intensivisht nga SPAK, që dyshon se paratë mund të jenë fituar përmes aktiviteteve të paligjshme, përfshirë korrupsionin në tendera.
Një dosje e ndarë nga një skandal më i gjerë
Hetimi për ngjarjen e grabitjes dhe pengmarrjes është tashmë i ndarë nga dosja fillestare për shkeljet në tendera. Në këtë të fundit, janë marrë të pandehur 11 zyrtarë, përfshirë edhe kryetarin e Komisionit të Prokurimeve Publike, Jonaid Myzyri. Ata akuzohen për favorizime në ndarjen e kontratave dhe shkelje të rënda të ligjit mbi prokurimet publike.
Ngjarja e fundit ngrit edhe më shumë shqetësime mbi lidhjet e mundshme mes korrupsionit shtetëror dhe grupeve kriminale që nuk ngurrojnë të përdorin dhunën ekstreme për të ruajtur interesat e tyre.
Hetimet vazhdojnë – priten zhvillime të tjera
SPAK po vijon me thellimin e hetimeve në dy pista paralele: e para, për të zbuluar origjinën e vërtetë të shumës së madhe të parave të përmendura; dhe e dyta, për të zbardhur rrethanat e grabitjes dhe aktit të pengmarrjes.
Burime të brendshme pranë SPAK bëjnë të ditur se hetimi është intensiv dhe nuk përjashtohet mundësia e arrestimeve të reja apo nxjerrjes në dritë të elementëve të tjerë të përfshirë në këtë rrjet të dyshuar kriminal.
Be First to Comment