Kreu i SPAK, Altin Dumani, njoftoi se gjatë procesit zgjedhor janë paraqitur 56 kallëzime nga partitë politike për krime të pretenduara zgjedhore. Megjithatë, ai theksoi se të gjitha rastet që lidhen me shitblerjen e votës kanë rezultuar pa prova konkrete.
“Shumë kallëzime nga subjektet politike kanë pasur të bëjnë me fenomene si ‘asfalt elektoral’, punësime të paligjshme dhe përdorim i administratës publike në funksion elektoral,” – deklaroi Dumani. Por, sipas tij, hetuesit e SPAK që kanë verifikuar rastet në terren nuk kanë arritur të faktojnë elementë të veprës penale në këto raste.
Shumica e kallëzimeve, të pabazuara në prova
Nga 193 materiale në total që janë referuar në SPAK – përfshirë kallëzime nga policia, qytetarët, prokuroritë, partitë politike dhe nisma të vetë SPAK – janë regjistruar 39 procedime penale në hetim. Por vetëm 4 prej tyre janë të lidhura me kallëzime të partive politike.
Ndërkohë, për 43 kallëzime është marrë vendim mosfillimi i procedimit penal, për shkak të mungesës së elementëve të veprës penale. Këto raste lidhen kryesisht me pretendime të partive politike gjatë fushatës.
Be First to Comment