Deputetja e Partisë Demokratike, Ina Zhupa, ka ndarë sot një video nga interpelanca e saj në Kuvend me Ministren e Mjedisit dhe Turizmit, Mirela Kumbaro, e zhvilluar më 19 dhjetor 2024. Në qendër të debatit qëndronte çështja e zonave të mbrojtura dhe investimeve të ashtuquajtura “strategjike”, me fokus të veçantë në Theth.
Sipas Zhupës, deklaratat e ministres gjatë asaj interpelance bien ndesh me zhvillimet aktuale në Theth, ku disa bujtina dhe struktura të tjera po shemben. Ajo rikujton se Kumbaro atëherë i konsideronte bujtinat si pjesë të zhvillimit të eko-turizmit dhe mbështeste ndryshimet ligjore si të domosdoshme për të mbajtur banorët në zonat rurale.
Zhupa ka kundërshtuar ashpër këtë qasje, duke e cilësuar qeverinë si “terroriste mjedisore” dhe akuzuar ministren për favorizim të investitorëve privatë në dëm të komuniteteve lokale. Ajo thekson se çdo ndërhyrje apo reformë në zonat e mbrojtura ka për synim, sipas saj, vetëm interesat e grupeve të caktuara dhe jo të banorëve të zonës.
Ngjarjet e fundit në Theth, sipas Zhupës, e nxjerrin në pah hipokrizinë e qeverisë, e cila – siç shprehet ajo – po përdor ligjet dhe institucionet për t’i dorëzuar pasuritë natyrore të vendit në duart e investitorëve të privilegjuar. https://www.facebook.com/watch/?v=1208718181054208
Be First to Comment