Drejtoresha e Agjencisë Kombëtare të Shoqërisë së Informacionit, Mirlinda Karçanaj, ka dalë pas tre orësh nga ambientet e Prokurorisë së Posaçme kundër Korrupsionit dhe Krimit të Organizuar.
Mirlinda Karçanaj ashtu siç hyri në ambientet e SPAK, doli e shoqëruar nga avokatja e saj ndërsa nuk bëri asnjë koment për mediat të cilat ishin të pranishme.
Nuk dihet saktësisht se për çfarë është pyetur drejtuesja e AKSHI-t ndërsa avokatja e saj teksa gazetarët u afruan për t’i bërë pyetje Karçanajt, tha: “Mos prek, mos prek.”
Kujtojmë se gjatë ditëve të fundit, disa punonjës të AKSH, por dhe të deleguar pranë disa ministrive, janë paraqitur për t’u marrë në pyetje nga SPAK.
Këto lëvizje kanë ardhur pas denoncimit të bërë nga Partia Demokratike ku akuzoi Agjencinë Kombëtare të Shoqërisë dhe Informacionit se ka bërë kontrata të dyshimta me vlerë miliona euro.
Sipas denoncimit të selisë blu janë shpenzuar 7 milionë euro me TVSH gjatë periudhës 2018-2025, duke përdorur procedura të mbyllura dhe pa transparencë, me negocim pa shpallje të njoftimit të kontratës, dhe me të njëjtin përfitues në çdo rast.
Be First to Comment