Komisioni i Ankesave dhe Sanksioneve ka rrëzuar ankimimin e kandidates së PD-së, Andia Ulliri, duke konfirmuar mandatin e deputetit për qarkun Durrës për Arjan Ndojën, ish-prokuror i shkarkuar nga vettingu.
Vendimi u mor pasditen e sotme, pasi KAS shqyrtoi kërkesën e Ullirit, e cila nuk arriti të rizgjidhej nga lista e hapur për legjislaturën e ardhshme. Kandidatja pretendon se duhet të përfitonte mandatin në bazë të kuotës gjinore 30%, pasi nga 5 fituesit në listën e mbyllur të Durrësit, vetëm një është grua.
Përfaqësuesi ligjor i Ullirit, Indrit Sefa, theksoi se në disa qarqe, përfshirë edhe Lezhën, kuotat gjinore nuk janë respektuar, dhe kërkoi që Kodi Zgjedhor të zbatohet plotësisht.
Por KQZ deklaroi se mandatet janë shpërndarë sipas renditjes dhe votave në listat përkatëse, duke përjashtuar ndërhyrje të mëtejshme.
Rreth orës 14:00, KAS shpalli vendimin final, duke rrëzuar përfundimisht pretendimin e Ullirit. Asaj i mbetet vetëm rruga e apelimit në Kolegjin Zgjedhor, për të vijuar betejën e saj ligjore.
Be First to Comment