TIRANË – Situata në kampin e koalicionit “Shqipëria Bëhet” vazhdon të jetë e paqartë, teksa Komisioni i Ankesave dhe Sanksioneve (KAS) ka rrëzuar vendimin e KQZ-së që i jepte mandatin e deputetit Kleana Xhuvelit. Vendimi i ri i rikthen mandatin Ana Dajkos, e renditur e para në listën e mbyllur të këtij koalicioni.
Sipas KAS, dorëheqjet në grup të dorëzuara më 11 maj nga kandidatët e listës së mbyllur janë akte të pavlefshme ligjërisht, dhe Celibashi nuk duhej t’i pranonte ato.
“Akti i dorëheqjes nga kandidimi ditën e zgjedhjeve është nul dhe nuk prodhon asnjë efekt juridik. Ai nuk mund të merret në konsideratë nga KQZ,” thuhet në vendimin e KAS.
Ana Dajko, 60 vjeçe nga Saranda, është përzgjedhur në listë nga i biri i saj, anëtar i kryesisë së koalicionit. Ajo nuk ka angazhim politik të mëparshëm.
Koalicioni “Shqipëria Bëhet” kishte mbushur listat me të afërm dhe besnikë, të cilët firmosën dorëheqje për t’i hapur rrugë deputetëve me më shumë vota personale nga lista e hapur. Por përplasjet e brendshme, përfshirë tërheqjen nga dorëheqja e Zeqir Kordhonit dhe Kleana Xhuvelit, la jashtë Kuvendit Adriatik Lapajn, liderin e koalicionit.
Megjithatë, Lapaj ka ende një mundësi të fundit në Kolegjin Zgjedhor, ku pritet të shqyrtohet ankimimi i tij.
Në të njëjtën seancë, KAS rrëzoi edhe pretendimin e Andia Ullirit për të përfituar mandatin në bazë të përfaqësimit gjinor, duke konfirmuar si fitues Arjan Ndojën, kandidatin demokrat nga Durrësi.
Be First to Comment