Policia e Tiranës ka vënë në pranga Bahri Hysën, 63 vjeç, banues në Fushë-Stanë, si autorin e dyshuar të zjarrvënies së qëllimshme që përfshiu zonën e mbrojtur të Malit me Gropa, brenda Parkut Kombëtar të Dajtit. Zjarri i rënë një ditë më parë dogji mbi 600 hektarë kullota dhe bimësi natyrore, duke shkaktuar një nga dëmet më të mëdha mjedisore të kësaj vere.
Sipas hetimeve paraprake, 63-vjeçari, i cili punonte si bari në zonë, kishte ndezur zjarr në një sipërfaqe kullotë në vendin e quajtur “Fushë Stanë”. Për shkak të erës së fortë dhe temperaturave të larta, flakët u përhapën me shpejtësi dhe përfshinë lugina të thella dhe pika të ndjeshme të parkut si Gryka e Mullinit dhe Qafa e Qershisë.
Ngjarja ka shkaktuar shqetësim të madh për dëmin e rëndë ekologjik, ndërsa materialet për këtë rast i janë referuar Prokurorisë për veprime të mëtejshme, me akuzën për “Shkatërrim me zjarr i pyjeve dhe i mjedisit pyjor”.
Be First to Comment