Pëllumb Pilinci, një emër që deri vonë nuk njihej nga publiku i gjerë, ka shpërthyer në politikën shqiptare me një stil të pazakontë që përzien retorikë të fortë populiste me spektakël mediatik. Pas skenës së bujshme të shfaqjes së tij në Theth, ku u shfaq me truproja të veshur me kostume të zeza dhe makinë luksoze me targa të personalizuara, Pilinci deklaroi veten si “shpresa e re e popullit” dhe shpalli të ashtuquajturën “qeveri hije”, që sipas tij ka për mision të përmbysë qeverinë aktuale të Edi Ramës
Zbarkimi i tij në Theth ishte një skenë e denjë për filma hollywoodianë. Në sfond valëviteshin flamuj shqiptarë dhe banderola me parulla nacionaliste si “Shqipëria për shqiptarët” dhe “Koha e të vërtetës”. Para një grupi ndjekësish të mbledhur, ai lëshoi akuza të rënda ndaj qeverisë duke e quajtur një regjim që po shembet dhe premtoi se do ta “tërheqë zvarrë Ramën nga pushteti”, deklaratë që shpërtheu në rrjetet sociale me reagime të përziera, nga entuziazmi tek ironia dhe dyshimi
Pamjet nga kjo ngjarje u shpërndanë me shpejtësi në TikTok, Instagram dhe Facebook. Pilinci u krahasua nga ndjekësit dhe komentuesit me figura ndërkombëtare si Donald Trump, Silvio Berlusconi dhe presidenti i El Salvadorit Nayib Bukele për stilin e tij të drejtpërdrejtë, fjalorin e ashpër dhe mënyrën si kërkon të dalë mbi sistemin ekzistues duke folur “në gjuhën e popullit”
Shumë mbështetës e shohin si një prani të re që trondit klasën politike shqiptare, ndërsa të tjerë e konsiderojnë një fenomen kalimtar që po shfrytëzon zhgënjimin e përgjithshëm ndaj sistemit. Sido që të jetë, Pilinci është shndërruar në një emër që po përflitet gjithnjë e më shumë, ndërsa deklaron se ka gati një kabinet alternativ me emra konkretë që do ta prezantojë në ditët në vijim
Comments are closed.