Një adoleshente 19-vjeçare, Áine Rose Hurst, ka humbur jetën tragjikisht pas një mpiksje gjaku që i shkaktoi dëmtime fatale në tru, e cila mendohet të jetë lidhur me përdorimin e një pilule kontraceptive.
Sipas raportimeve të britanikës The Sun, Áine ishte dërguar në spital pa ndjenja dhe mjekët zbuluan se mpiksja e gjakut kishte shkaktuar ënjtjen e trurit, që çoi në vdekjen e saj në mars të këtij viti.
Áine kishte përdorur pilulën kontraceptive për dy vjet, duke filluar nga viti 2020. Pas hetimeve të kryera, autoritetet kanë konfirmuar se pilula, e njohur si Femodette, ka qenë shkaktari kryesor i mpiksjes së gjakut, që përfundoi tragjikisht.
Një vit para vdekjes, një infermiere kishte sugjeruar që Áine të ndalonte marrjen e kontraceptivëve, pasi kishte vënë re një rritje të tensionit të saj. Sidoqoftë, vajza vazhdoi të përdorte ilaçin derisa pasojat tragjike ndodhën.
Mjeku ligjor i Boltonit, Peter Sigee, shpjegoi se pilulat kontraceptive kanë efekte anësore për një në 10,000 individë dhe theksoi se Femodette kontribuoi drejtpërdrejt në vdekjen e Áine. Ai e përshkroi vdekjen si një “ndërlikim të rrallë” të ilaçeve që ishin përdorur siç duhet.