Vendi vazhdon të jetë nën ndikimin e masave të lagështa, të cilat po sjellin vranësira të dendura dhe reshje shiu në një pjesë të mirë të territorit. Sipas parashikimit më të fundit nga sinoptikani i MeteoAlb, Hakil Osmani, situata pritet të jetë më e ndërlikuar në jug dhe në zonat qendrore, ndërsa veriu do të përballet me reshje më të izoluara e me intensitet më të ulët.
“Në orët në vijim, sidomos gjatë pasdites dhe mbrëmjes, jugu do të jetë më i ekspozuar ndaj reshjeve me intensitet mesatar deri të lartë,” u shpreh Osmani. Sipas tij, zonat më problematike mbeten ato të Vlorës, Gjirokastrës dhe pjesërisht qendra e vendit, ku priten periudha të herëpashershme me rënie të konsiderueshme shiu.
Ndërkohë, pjesa veriore e vendit do të jetë më pak e prekur, megjithëse nuk përjashtohen periudha me reshje të lehta. “Nuk do të ketë një shtrirje uniforme. Në veri sasia e reshjeve do të jetë dukshëm më e kufizuar, duke e bërë këtë rajon më pak të rrezikuar,” theksoi sinoptikani.
Megjithatë, ka edhe lajme pozitive për ditët në vijim. Sipas Osmanit, e premtja do të sjellë ndryshime të lehta dhe një ulje graduale të intensitetit të reshjeve. “Nuk mund të flasim për përmirësim të menjëhershëm dhe të plotë, por pritet një zbutje e dukshme e situatës sidomos në bregdet dhe në pjesën perëndimore të vendit,” ka deklaruar ai.
Ky përmirësim pritet të përhapet gradualisht edhe në lindje, ku reshjet do të reduktohen në sasi dhe do të shfaqen më të rralla gjatë ditës së premte. Edhe pse dielli nuk është ende në skenar, pritet që gjendja e motit të bëhet më e qëndrueshme dhe më pak problematike krahasuar me ditët e fundit.
Sipas MeteoAlb, stabilizimi më i dukshëm i kushteve atmosferike pritet të fillojë nga fundjava, duke sjellë një pauzë të shkurtër nga intensiteti i lartë i reshjeve që ka shoqëruar vendin kohët e fundit.
Be First to Comment