Një grup banorësh nga Mirdita janë nisur sot drejt Thethit, në një akt simbolik solidariteti me komunitetin e Shalës dhe Shoshit në Dukagjin, pas aksionit të fundit të IKMT-së për prishjen e ndërtimeve pa leje në këtë zonë turistike.
Nën moton “Mirdita solidarizohet me Dukagjinin”, iniciativa synon të japë një mesazh të qartë mbështetjeje për banorët vendas, duke sjellë në vëmendje sfidat e tyre në ruajtjen e jetesës, trashëgimisë dhe të drejtës për të jetuar në trojet e tyre historike.
“Kur shteti kthehet në agresor, populli mbledh kanunin. Kryeministri shkon para votimeve për t’u thënë ‘i gëzofshi’ dhe më pas ua prish shtëpitë. S’ka pabesi më të madhe se kjo,” – deklaroi një nga qytetarët mirditorë që mori pjesë në këtë udhëtim.
Ndërkohë, në Theth ishte i pranishëm edhe ish-deputeti Kujtim Gjuzi, i cili përsëriti thirrjen që qeveria të dëmshpërblejë banorët për dëmet e shkaktuara nga prishjet. Ai e cilësoi aksionin si një goditje të padrejtë ndaj komuniteteve që kanë mbajtur gjallë turizmin dhe kulturën e veriut.
Banorët mirditorë vunë në dukje lidhjet historike dhe kulturore mes dy zonave, duke theksuar se Mirdita ka qenë gjithmonë krah për krah me pjesën tjetër të Veriut në kohë të vështira: “Sot rikonfirmojmë lidhjet e gjakut, të besës dhe të trashëgimisë me Dukagjinin.”
Kjo iniciativë solidariteti vjen menjëherë pas përfundimit të aksionit të IKMT-së në Theth, duke treguar se reagimi publik ndaj ndërhyrjes shtetërore në këto zona të ndjeshme vijon të jetë i fortë dhe emocional.
Be First to Comment