Një grup kriminal që mashtronte qindra shtetas gjermanë përmes një call center-i në Shqipëri është goditur nga Operacioni “Pandora”, i zhvilluar nga SPAK në bashkëpunim me autoritetet gjermane.
Sipas të dhënave zyrtare, 5 persona janë arrestuar, 3 janë vendosur në arrest shtëpie, ndërsa 2 të tjerë janë shpallur në kërkim. Grupi përdorte metoda mashtrimi përmes komunikimeve telefonike dhe online, duke shkaktuar një dëm financiar prej 365 mijë euro ndaj viktimave në Gjermani.
Gjatë kontrollit në ambientet e një call center-i, janë sekuestruar prova materiale të shumta, përfshirë pajisje elektronike dhe dokumentacion që mbështet dyshimet për aktivitetin kriminal.
“Kishim të bënim me hetime paralele në Shqipëri dhe Gjermani. Kontrolli në call center nxori në pah prova të qarta të përfshirjes në mashtrime me natyrë kompjuterike”, deklaroi një nga prokurorët e SPAK.
Hetimet për këtë rast vazhdojnë në bashkëpunim të ngushtë me autoritetet partnere gjermane, ndërkohë që priten arrestime të tjera dhe ndëshkim për të gjithë të përfshirët në këtë skemë kriminale.