Në daljet e fundit publike, agjentët imobiliarë në Tiranë janë përfshirë në një fushatë të zëshme për të justifikuar çmimet e larta të apartamenteve, në përpjekje për të ruajtur stabilitetin e tregut përballë efekteve që ka nisur të prodhojë taksa e re mbi pronat e dyta. E zbatuar që nga fillimi i vitit 2024, kjo taksë synon të godasë financiarisht ata individë që zotërojnë më shumë se një apartament, duke u vendosur një barrë të re fiskale që varion nga 150 deri në 300 euro në vit për çdo pronë shtesë, në varësi të sipërfaqes dhe vendndodhjes. Kjo është një rritje e ndjeshme krahasuar me nivelin e mëparshëm, që në shumicën e rasteve nuk e kalonte vlerën prej 50 eurosh në vit, dhe që tashmë po e kthen mbajtjen e një prone të papërdorur në një barrë të panevojshme për shumë pronarë.
Në komunikimet me median, shumë agjentë pretendojnë se kjo taksë do të ndikojë në rritjen e çmimeve të apartamenteve, një argument që në të vërtetë bie ndesh me logjikën bazë të ekonomisë. Në vend që të ngrejë çmimet, taksa e re pritet të ushtrojë një presion të drejtpërdrejtë mbi uljen e tyre, pasi pronat e dyta që mbahen bosh do të rezultojnë të kushtueshme për t’u ruajtur, duke i detyruar pronarët t’i nxjerrin në shitje ose të ulin ndjeshëm çmimin e qirasë për të mos pësuar humbje. Kjo prirje mund të shndërrohet në një valë të re ofertash në treg, çka do të thellojë më tej raportin e pabarabartë midis ofertës dhe kërkesës.
Sipas të dhënave nga vetë sektori, aktualisht në Tiranë ndodhen të paktën 70 mijë apartamente të pashitura apo të papërdorura, një shifër që tregon qartë se tregu është në një fazë tepricë oferte. Kjo është një situatë që në çdo treg të lirë do të çonte në ulje të çmimeve, pasi kur oferta e tejkalon ndjeshëm kërkesën, vlera e produkteve fillon të bjerë. E përforcuar nga rënia e kërkesës, sidomos për shkak të çmimeve të papërballueshme për një familje mesatare shqiptare, situata aktuale e bën të pamundur mbajtjen e çmimeve të larta në mënyrë të qëndrueshme.
Në këtë klimë ekonomike që po ndryshon me shpejtësi, përpjekjet e agjentëve për të mbrojtur çmimet e apartamenteve duken më shumë si përpëlitje për të ruajtur interesat e një tregu që po përballet me realitetin e ri. Me ofertën që po rritet dhe kërkesën që po bie, ulja e çmimeve nuk është më një skenar hipotetik por një proces që ka nisur tashmë, dhe që në muajt e ardhshëm pritet të thellohet më tej. Tregu imobiliar në Tiranë ndodhet në një pikë kthese, ku ruajtja e çmimeve të larta do të jetë jo vetëm e vështirë, por edhe në kundërshtim me zhvillimet e pritshme ekonomike që po e drejtojnë sektorin drejt një rikthimi në ekuilibër.
Be First to Comment