TIRANË – Kryeministri Edi Rama ka reaguar pas debatit publik që ka shpërthyer për Draftin e ri të Kodit Penal, veçanërisht pas kundërshtive të shprehura nga shoqatat e gazetarëve dhe institucionet e drejtësisë. Në një reagim në platformën X (ish-Twitter), kreu i qeverisë theksoi se procesi i hartimit është kryer nga ekspertë të fushës, ndërsa palët e tjera, përfshi organizatat dhe institucionet, janë palë të përfshira, jo bashkëhartues të draftit.
“Të mos bëjnë deklarata qesharake”
Duke iu referuar reagimeve nga organet e drejtësisë, Rama kërkoi dialog profesional, duke e cilësuar të papranueshme sjelljen e tyre në media. “Mos bëni deklarata qesharake. Uleni me ekspertët dhe diskutoni konkretisht ndryshimet e nevojshme”, shkroi ai.
Proces me konsultim të gjerë dhe verifikim nga BE
Rama theksoi se drafti do t’i nënshtrohet një procesi të gjerë konsultimi me të gjitha palët e interesuara, përfshi Qeverinë, median, shoqërinë civile, institucionet e drejtësisë dhe partnerët ndërkombëtarë. Në përfundim, Drafti do t’i dorëzohet Komisionit Europian për vlerësim, pa të cilin, sipas tij, Kodi i ri nuk do të kalojë në Kuvend.
“Pa vendimin e BE-së, ky Kod nuk kalon. Nuk ka ‘vulë’ pa Brukselin,” deklaroi Rama, duke garantuar transparencë dhe përfshirje institucionale në këtë proces të rëndësishëm reformues.
Be First to Comment