Çfarë ka në pakon ushtarake 652 milionë dollarëshe që SHBA-ja po ia shet Ukrainës

Pas përfundimit pa rezultat të negociatave ndërmjet Rusisë dhe Ukrainës më 23 korrik, Uashingtoni ka njoftuar dy paketa të reja të ndihmës ushtarake për Kievin, me një vlerë totale prej mbi 650 milionë dollarësh.

Fillimisht, Departamenti amerikan i Shtetit miratoi një paketë me vlerë 322 milionë dollarë për furnizimin e Ukrainës me pajisje dhe sisteme mbështetëse. Vetëm një ditë më pas, u konfirmua edhe një tjetër pako, në vlerë prej 330 milionë dollarësh.

Sipas Pentagonit, kjo ndihmë do të përdoret për përforcimin e dy sistemeve armësh që tashmë Ukraina i përdor në fushëbetejë. Konkretisht, do të përfshijë mbështetje shtesë për sistemin raketor HAWK, me një vlerë prej 172 milionë dollarësh.

Raketa HAWK (Homing All The Way Killer), e zhvilluar në vitet ‘50 për mbrojtje kundër avionëve luftarakë dhe raketave, është përdorur gjerësisht në të kaluarën, përfshirë edhe gjatë Krizës Kubane më 1962. Megjithëse është konsideruar e vjetruar për standardet moderne, kërcënimi nga dronët e ngadaltë Shahed të prodhimit iranian e ka rikthyer këtë sistem në përdorim aktiv.

Sipas ushtrisë ukrainase, vetëm një sistem HAWK ka rrëzuar deri më tani 40 dronë dhe 14 raketa ruse.

Përveç sistemit HAWK, paketa e ndihmës përfshin edhe autoblindat Bradley, me një vlerë prej 150 milionë dollarësh. Këto mjete luftarake, të ndërtuara fillimisht gjatë Luftës së Ftohtë, shërbejnë si transportues trupe në terrene të vështira, duke ofruar një kombinim të mbrojtjes dhe fuqisë zjarrtare përmes topit 25 mm dhe raketave antitank.

Sipas të dhënave, mbi 150 njësi Bradley të dërguara më parë në Ukrainë janë shkatërruar, braktisur apo kapur nga forcat ruse. Vetëm në një betejë në jug të Ukrainës në qershor 2023, janë shkatërruar 17 autoblinda të tilla.

Ndihma përfshin gjithashtu pajisje për riparimin dhe mirëmbajtjen e obusëve M109, si dhe mbështetje për sistemet amerikane të mbrojtjes ajrore.

Administrata amerikane ka nënvizuar se kjo ndihmë e re nuk do të ndryshojë ekuilibrin bazik ushtarak në rajon, por përbën një përforcim të kapaciteteve mbrojtëse të Ukrainës përballë kërcënimeve të vazhdueshme nga Rusia.