Një ngjarje e rëndë dhe tronditëse ka ndodhur në fshatin Frashër të Fierit, ku një 26-vjeçare ka vrarë të atin me tel, ndërsa e ëma ka ndihmuar në fshehjen e krimit. Viktima, 56-vjeçari Anesti Rama, është tentuar të paraqitet fillimisht si viktimë e një vdekjeje aksidentale, por hetimet zbuluan të vërtetën makabre.
Si ndodhi krimi
Ngjarja u regjistrua mbrëmjen e së mërkurës, rreth orës 23:00. Vajza, Ermalinda Rama, së bashku me të ëmën, Valbona Rama, paraqiten në komisariat dhe raportojnë se Anesti ka vdekur në banjë pas një “aksidenti”. Megjithatë, versioni i dhënë nga familjaret nuk i bind oficerët e policisë, të cilët nisin menjëherë hetimet.
Shpejt u zbuluan shenjat e një mbytjeje me tel, të kombinuara me shenja dhune në trupin e viktimës, përfshirë në pjesët intime – sipas raportit mjeko-ligjor.
Në dëshminë e saj, vajza ka pranuar se e ka vrarë të atin për shkak të, sipas saj, trajtimit të keq, kufizimeve të forta dhe mentalitetit fanatik që ai ushtronte ndaj saj. “Nuk më linte të bëja jetën që doja,” thuhet të ketë deklaruar ajo në polici.
E ëma e arrestuar për bashkëpunim
Ndërkohë që nëna, 53-vjeçarja Valbona Rama, tentoi fillimisht të hiqej si e painformuar, hetimet e zbuluan pjesëmarrjen e saj aktive në fshirjen e gjurmëve dhe në ndërtimin e versionit të rremë të vdekjes.
Policia e Fierit njoftoi arrestimin e saj për veprën penale “Veprime që pengojnë zbulimin e së vërtetës”.
“Në vijim të hetimeve… specialistët e Seksionit për Hetimin e Krimeve Kundër Personit të Drejtorisë Vendore të Policisë Fier bënë arrestimin në flagrancë të 53-vjeçares”, thuhet në njoftimin zyrtar.
Komuniteti në tronditje: Viktima ishte i qetë, punëtor, por i dhunuar nga familja
Kryeplaku i fshatit, në një prononcim për Top Channel, ka shprehur indinjatën dhe dhimbjen e komunitetit për këtë vrasje. Ai e përshkruan Anesti Ramën si një burrë punëtor dhe pa zë, që shpesh ankonte për trajtimin e keq në familje, përfshirë dhunë psikologjike dhe ekonomike.
“E linin pa bukë, e dhunonin në sytë e mi. Vetëm punonte dhe duronte. Ka ardhur shpesh e më është ankuar: ‘Duan të më nxjerrin nga shtëpia’. E shkreta jetë,” – shprehet ai.
Po sipas dëshmive të komshinjve, Anesti jetonte në kushte të vështira dhe shpesh izolohej në një dhomë të veçantë jashtë banesës, ku dyshohet se qëndronte nën presion të vazhdueshëm.
Hetimet vazhdojnë, priten ekspertiza të mëtejshme
Grupi hetimor është ende në punë për të dokumentuar plotësisht rrethanat dhe motivet e vrasjes, si dhe për të vlerësuar nëse në familje kanë ekzistuar probleme të natyrës psikologjike, ndonëse deri më tani nuk ka prova për probleme të shëndetit mendor tek ndonjëri nga anëtarët e familjes.
Në pritje të njoftimeve të mëtejshme nga autoritetet, ngjarja mbetet një nga më të rëndat e këtij viti, duke nxitur diskutime të thella rreth dhunës brenda familjes, shëndetit mendor, rolit të komunitetit dhe mungesës së ndërhyrjes së hershme nga institucionet.
Be First to Comment