Një ngjarje e rëndë ka tronditur opinionin publik këtë të enjte në lagunën e Patokut, ku një 16-vjeçar ka humbur jetën tragjikisht pasi u mbyt në ujërat e rrezikshme të kanalit që lidh lagunën me detin Adriatik.
Ngjarja ka ndodhur rreth orës 15:00, kur dy të mitur, moshatarë, kanë hyrë në ujë për t’u larë, duke zgjedhur një nga segmentet më të rrezikshme të zonës. Sipas Policisë së Shtetit, të rinjtë kishin tentuar të kalonin përmes kanalit natyror që lidh lagunën me detin, një zonë e njohur për rrjedhën e fortë dhe turbullirën e ujërave.
Njëri u shpëtua, tjetri u zhduk në thellësi
Gjatë larjes, njëri prej të rinjve humbi ndjenjat në ujë dhe u zhduk. Banorët e zonës arritën të nxjerrin shokun e tij, i cili u dërgua me urgjencë në spital dhe ndodhet jashtë rrezikut për jetën. Trupi i 16-vjeçarit tjetër nuk ishte gjetur deri në orët e mbrëmjes, ndërsa kërkimet janë intensifikuar nga forcat e specializuara.
Policia, zjarrfikësit dhe njësitë RENEA janë angazhuar me pajisje zhytjeje për të lokalizuar trupin e të miturit. Operacioni i kërkimit vijon mes vështirësive që sjell relievi nënujor i zonës.
Zona me precedentë të rrezikshëm
Luguna e Patokut dhe kanali që e lidh me detin janë prej kohësh të njohura si pika të rrezikshme për larje, veçanërisht për notarët e papërvojë. Ujërat e thella, rrymat e forta dhe mungesa e çdo sinjalistike apo sigurie e organizuar i kanë kthyer këto ujëra në një kurth të përsëritur vdekjes, veçanërisht gjatë stinës së verës.
Banorët e zonës shprehen të shqetësuar për mungesën e rojeve bregdetare, paneleve paralajmëruese dhe veprimit konkret nga autoritetet, pavarësisht thirrjeve të përsëritura ndër vite për të parandaluar tragjedi të tilla.
Hetime dhe përgjegjësi institucionale
Policia dhe Prokuroria kanë nisur hetimet për të dokumentuar rrethanat e ngjarjes dhe për të vlerësuar nëse ka pasur mospërmbushje të detyrimeve nga autoritetet lokale në lidhje me garantimin e sigurisë në këtë zonë.
Ndërkohë, familja e të miturit është në gjendje tronditjeje, ndërsa banorët janë mbledhur pranë vendit të ngjarjes, duke ndjekur me ankth operacionin për gjetjen e trupit të pajetë.
Alarm i përsëritur për institucionet shtetërore
Ngjarja e sotme është një tjetër alarm i fuqishëm për autoritetet, që edhe pse në kulmin e sezonit turistik, vazhdojnë të neglizhojnë sigurinë në zonat ujore, duke lënë fëmijët dhe të rinjtë të pambrojtur përballë rreziqeve që mbart natyra.
Nëse nuk merren masa të menjëhershme për sinjalistikë, vëzhgim dhe ndërgjegjësim publik, tragjedi të tilla rrezikojnë të përsëriten – duke mos qenë më aksidente, por pasojë e mosveprimit institucional.
Be First to Comment