Zbulohet dokumenti – Plas në PS? Ministrja i bën ‘golin’ e papritur kryebashkiakes – Detajet

Pas arrestimit të Erion Veliajt, Bashkia e Tiranës është kthyer në një fushëbetejë për kontrollin e pushtetit lokal. Një përplasje e ashpër po zhvillohet brenda vetë mazhorancës, ku figura të fuqishme politike po luftojnë për të vendosur dominimin e tyre mbi institucionin më të madh vendor në vend.

Emërimi i Anuela Ristanit si kryetare në detyrë nga Kryeministri Edi Rama, në fillim u interpretua si një zgjedhje strategjike dhe e besuar. Por nuk zgjati shumë që kjo ngritje të provokonte reagime të brendshme, duke nxitur prapaskena dhe sulme sistematike ndaj saj.

Sipas burimeve të afërta me zhvillimet, sulmet kanë nisur në mënyrë të koordinuar dhe nuk vijnë nga opozita – e cila është ende në fazë rigjenerimi pas humbjes elektorale – por nga brenda vetë Partisë Socialiste. Ristani është vënë në shënjestër jo vetëm personalisht, por edhe përmes familjarëve të saj.

Goditja e parë: largimi i motrës së Ristanit nga Politekniku

Një lëvizje që ka tërhequr vëmendjen është shkarkimi i Adrianës Ristani – motra e Anuela Ristanit – nga pozicioni në Bordin e Administrimit të Universitetit Politeknik të Tiranës. Adriana kishte një profil profesional në arsim dhe ishte emëruar në këtë rol që në vitin 2021, shumë përpara se motra e saj të merrte drejtimin e përkohshëm të Bashkisë.

Por, sipas burimeve, ky shkarkim është bërë pa asnjë paralajmërim dhe ka ardhur drejtpërdrejt nga ministrja e Arsimit, Ogerta Manastirliu. Momenti dhe mënyra e shkarkimit janë interpretuar nga shumëkush si pjesë e një hakmarrjeje politike dhe jo një vendim profesional.

Manastirliu në lëvizje për Bashkinë?

Me historikun e saj në administratën e Tiranës dhe rolin aktiv në fushatën e fundit parlamentare, Manastirliu shihet si një nga figurat që po synon të zërë hapësira të reja pushteti. Në prapaskenë, thuhet se ajo është e vendosur të marrë frenat e Bashkisë së Tiranës, duke sfiduar edhe figura të tjera të fuqishme brenda kabinetit, përfshirë Belinda Ballukun.

Në këtë garë të brendshme për dominim, përplasen ambiciet personale me interesat e grupeve politike që kanë kapur rrënjë në mazhorancë. Për momentin, Anuela Ristani po përballet me një klimë të ftohtë dhe mungesë mbështetjeje, ndërsa tensionet brenda PS-së pritet të përshkallëzohen në javët në vijim.